فہمیدہ ریاض پاکستان کی ان سب سے زیادہ نامور شاعرائوں میں سے ایک ہیں جو اپنی شاعری میں تحریک ازادیء نسواں اور ترقی پسند خیالات کی وجہ سے قابل تکریم ٹھہرائي جاتی ہیں۔ آجکل کراچی میں بسنے والی فہمیدہ ریاض اٹھائیس جولائي انیس سو اڑتالیس کو میرٹھ بھارت میں پیدا ہوئی تھیں جنکی پہلی نظم پندرہ سال کی عمر میں شایع ہوئی ۔ فہیمیدہ ریاض نے اعلی ادب تخلیق کیا ہے، جن میں شاعری، نثر ،تراجم،اور بچوں کا ادب شامل ہے۔ انکی تحریریں جتنی مترنم ہوتی ہیں اتنی ہی پڑہنے والے کو تناور و موثر لگتی ہیں ۔ جتنا انکی تخلیقات میں سوچ کا عمل ہے اتنا ہی انکی شاعری سیاسی سوچ سے پر ہے۔ اپنی جرئتمندانہ تحریروں اور ترقی پسنادانہ سیاسی اور ادبی سرگرمیوں کی وجہ سے ماضی میں ضیاء الجق کے دور آمریت میں وہ جبر کا شکار ہوئیں جسکی وجہ سے کئی برس انہیں جلاوطنی میں گذارنا پڑے۔ انکی کئی تصنیفات میں شاعری کا مجموعہ بدن دریدہ، ناویلا گوداواری ،اور رومی کے کلام کا فارسی سے پہلا اردو ترجمہ شامل ہیں۔ جبکہ انہوں نے سندھی زبان کے اعلی پایے کے شعرا شاہ عبدالطیف بھٹائي اور شیخ ایاز کی شاعری کے بھی تراجم کیے ہیں۔